رسالة لكل اللي ماحققش اللي بيتمناه في مرحلة الثانوية العامة ❤️
مش نهاية الدنيا .. ولا مستقبلك ضاع .. هي مجرد مرحلة صغيرة أوي من مراحل حياتك اللي فاتت واللي جاية إن شاء الله ..
وده بردو مش تقليلًا من أهميتها .. ولكن دي مجرد خطوة صغيرة أوي من خطواتك في اتجاه حياتك العملية .. لسه في خطوات جاية كتير مش بتقل أهميتها خالص عن الثانوية العامة بل بتكون أهميتها أكتر بكتير ..
اللي بيعدي مرحلة الثانوية والجامعة بيعرف قيمة الخطوات اللي بتيجي بعد الثانوية العامة .. اجتهادك في الكلية اللي بتدخلها أهم من الثانوية .. اجتهادك في التخصص اللي هتتخصصه بعد التخرج أهم من الثانوية .. اتقانك لشغلك بعد التخصص أهم من الثانوية .. التسويق لشغلك المتقن لما تبدأ مشوارك المهني أهم من الثانوية العامة ..
وببساطة مفيش حاجة اسمها كلية أفضل من كلية تانية .. احنا اتخلقنا عشان نكمل بعض .. ماينفعش البشرية كلها تبقى دكاترة ولا مهندسين ولا مدرسين ولا محاميين .. التنوع ده أساس استمرارية للبشرية كلها، من غيرها كان زمان البشرية انقرضت وانتهت ..!
ومش شرط الحاجة اللي كنت بتتمناها وماتحققتش إنها كانت الخير ليك .. ولا شرط إنك كنت هتنجح وتتفوق فيها .. وفي كل تخصص بنشوف الشاطر والخايب واللي ماحدش بيسمع عنه .. شوفنا الدكتور اللي مش شاطر رغم إنه كان جايب مجموع عالي في الثانوية .. وشوفنا المهندس اللي مش فاهم رغم إنه كان جاب مجموع عالي بردو .. وبيستمر وبينجح المتفوق والشاطر واللي عنده كفاءات في جوانب كتير أحيانًا كتير بتكون بعيدة عن تخصصه وهو اللي بينجح مش اللي جايب مجموع عالي في الثانوية ولا حتى اللي بيطلع الأول في الكلية .. ده غير إننا شوفنا اللي بينجح من غير ما يكون متعلم أو معاه شهادة حتى ..!
النجاح في الحياة مش بالثانوية ولا بالشهادات بس .. ليها جوانب تانية أولها توفيق من ربنا وآخرها السعي والاجتهاد .. ولازم تعرف إن أحياناً كتير بنتمنى حاجات بنكون فاكرين إن فيها الخير وبنزعل أوي لما مانعرفش نحققها بس ربنا بيكون ليه ترتيب تاني إنك تنجح في مجال مختلف وفيه قصص كتير حوالينا أكبر دليل على كده ..
ببساطة علشان تعرف تشوف حياتك الجاية محتاج تتجاوز الخطوة الصغيرة دي سواء جايب مجموع عالي أو حتى ماتوفقتش .. اللي جاي أهم بكتير من المرحلة اللي انت فيها .. ماتقفش عند أي مرحلة في حياتك واعتبرها درس ليك تتعلم منه، وحافز قوي علشان تعمل خطوات أهم بكتير في مستقبلك القريب والبعيد ❤️
الكاتبة / آلآء اسماعيل حنفي 
سيبلنا تعليق لطيف منك